İstifadə qaydaları
Bütün müştərilər eyni poçt serverlərindən istifadə edir. Bir hesabdan göndərilən spam hamının məktublarının çatmasına zərər verir. Bu qaydalar hər kəsin poçtunun etibarlı çatması üçündür.
Son yenilənmə: 30.10.2026
1. Nə göndərmək olar
- Şirkətinizin gündəlik yazışması: müştərilər, tərəfdaşlar və əməkdaşlarla məktublar.
- Saytınızın və sistemlərinizin bildirişləri: sifariş təsdiqi, şifrə bərpası, hesab-faktura və s.
2. Nə qadağandır
- Spam: alıcının razılığı olmadan göndərilən reklam və ya toplu məktublar.
- Saytlardan və bazalardan toplanmış və ya alınmış ünvan siyahılarına göndəriş.
- Kütləvi marketinq göndərişləri: xəbər bülletenləri, kampaniyalar. Onlar üçün ayrıca göndəriş xidmətlərindən (məsələn, Brevo, Mailchimp) istifadə edin.
- Fırıldaqçılıq (fişinq), zərərli faylların və ya qanunsuz məzmunun göndərilməsi.
- Başqasının adından və ya saxta göndərən ünvanı ilə məktub göndərmək.
3. Göndərmə limitləri
- Hər domen üçün saatlıq göndərmə limiti var. Limit qutu sayına görə hesablanır və idarəetmə panelində görünür.
- Limit adi iş yazışması üçün kifayətdir. Əsaslı ehtiyac olarsa, dəstəyə yazın, birlikdə baxaq. Toplu göndəriş üçün limit artırılmır.
4. Hesabların təhlükəsizliyi
- Güclü şifrə istifadə edin və şifrələri başqaları ilə bölüşməyin.
- Əməkdaş işdən çıxanda onun qutusunun şifrəsini dəyişin və ya qutunu dayandırın.
- Şifrənin oğurlandığından şübhələnsəniz, dərhal dəyişin və bizə xəbər verin.
- Qutularınızdan göndərilən məktublara görə şirkətiniz məsuliyyət daşıyır.
5. Nəzarət və tədbirlər
- Serverlərin etibarlı işləməsi üçün göndərmə həcmini və xarici serverlərin cavablarını avtomatik izləyirik. Spam və virus yoxlaması avtomatik aparılır, məktubların məzmununu əməkdaşlarımız oxumur.
- Spam, oğurlanmış şifrə və ya qaydaların pozulması aşkar edilərsə, həmin qutunun və ya domenin göndərişi xəbərdarlıqsız dayandırıla bilər. Bu barədə sizə dərhal məlumat veririk.
- Qaydalar təkrar və ya ciddi şəkildə pozularsa, xidmət dayandırıla bilər.
6. Şikayət və əlaqə
- bimail ünvanlarından gələn spam barədə: abuse@bimail.az
- Suallar üçün: dəstək səhifəsi və ya info@bimail.az